ÁVIGHÁ V’OKÓ KIYIRÓ KYE ULPGL Y’E VÚTEMBO VANÉMÚHĮRĮKĮRĮRWÁ NDEKE

ÁVIGHÁ V’OKÓ KIYIRÓ KYE ULPGL Y’E VÚTEMBO VANÉMÚHĮRĮKĮRĮRWÁ NDEKE

Omó múghulu onó w’amakángįrįrya áviryûmbya okó viyíró vusaná n’ovųkoní vw’e Covid-19, e ULPGL y’e Vútembo yinémuyikandanga eríhįrįkįrįrá ávighá v’omó mútahí w’ovúlíme (agronomie) oryíyįsyávó ehíkolanó híké híkê.

Ékiyiró ky’e ULPGL y’e Vútembo, omó mútahí w’ovúlímé kinémusivá n’avakolhó vákyo kíkíyįsyávo emíkoláno. Óvuli mukolhó akásiva eyí omo kalimá kíwe, ákákolhesyá mw’amakángįrįrya. Avághumá vághuma vakálima eyí y’esyónyínyį, n’ávandí íválímá y’esiri nga nganó n’evitsalį, n’ávandí návó íválímá vírivwá na karótį. Evitíngų vįtíngú vy’esyoswá, akarótį n’evitsungu kó vinûswíré vitya oko mufakiró wosí w’akalhási. Omúlume wa Kabuyaya Mwanamulere Osé, iye nga Muntómbe úkímanira ovusondolí vw’akalhási aká, avéré ávųlįvwa emíkolano eyí nga yiwíte mughasó wáhi, mwásųvírye ati : « Omó víró vinó v’eryusa oko mįvírį, įtwe nga ULPGL twánzįre óvulí mwighá w’omó mútahí w’ovúlíme íníanátóka eríyivanira olúbwelhe lúwe oko vírímwá angéryá ákákolhesya evyákîgha omo kalhási. »

Avakolhó vághumá vághuma avótwávándaná návó vákasoloma esyoswá n’akarótį móvatúlíréghó ngokó vatsemére kųndų amalhéngekaniá w’avasondolí v’akalhásí kávó k’e ULPGL y’e Vútembo. Omúlume wa Paluku Lulengo, iye nga mu « Ingénieur agronome » anémúkwamirira avakolhó vosí óvulí kíro. Omo malimá mw’eyį yikávya vakolho íkúmį (10) óvulí kíro, vangátóka eríkolá ívanásíkírye emighambó y’avasondolí v’ekíhughó éyísámalįre eríyikakįrya ok’ovukoní vw’e Codiv-19.

Paluku Lulengo mwátųlírégho ati : « Tunánzįre emíkolhere yetú íyanayísósa, kikálheká ítwaváníka omo malima anó mw’enó túkákolhesya évikásomawa omo kalhási. Ékiyiró hághumá n’ávighá vákyo twáviríyíhererá vusaná n’eríkokotya esyómbuto nyíhyáká sy’evitsungu vy’omúhandá w’akarolis. » N’eki kikándilheka akalhási k’e ULPGL íkakųmáyíra kutsívu vusaná n’erighalįma avaagronome ívįyíré ndeké kwenene.

Twívųkáyé ngoko e ULPGL yátsųka erívųyįsya avakolhó ávahésíré ndeke okó kirimó kye 2001. Yiwíté mítahí ndatu (6) : omútahí we Théologie protestante, omútahí w’ovútúnde (Economie et gestion), omútahí w’ekíngangá n’éngulakuláno (santé et développement communautaire), omútahí w’ovųghalíma, n’omútahí  w’ovųsósį n’omútahí w’ovúlíme (sciences agronomique et de la biodiversité).

SADIKI MATSINGA

Share

Laisser un commentaire

Votre adresse e-mail ne sera pas publiée. Les champs obligatoires sont indiqués avec *

LIVE OFFLINE
track image
Loading...