AVĮKALANÍ VAHITÉNÉ VUSANÁ N’ERÍTSANDÁ RY’ESYONDÁKĮ OMÓ VWAMÍ VW’AVASWÁGHA

Ávakávalama omo syondákí sy’e Kívúgha, Mábambį, Vuyinga, Muhángį n’e Musyenene vakáyikuna kutsivu tsívu oko mughómbe oyúherwe óvwįmanįrí vw’eríkokotya esyondákį esį, sy’omo ngaviró y’e Lubero, omó vwamí vw’avaswágha, násyó ísyosikálavaya akályo, erilwa omo malíma erilolyá k’omo mįyí n’omó hítalí mw’éhosí hosî. Avaghendį avá vavíríyituma eríkokotya esyondákį esį nga sálóngo.

Eriwá ry’esyongųrųvaní érityúmbaya omo nzirá sy’e Kívúgha,Mábambį, Vuyinga, Muhángį n’e Musyénéné érikávyá írinémúhųtalya avandú n’erítwa ovuyingó vw’ávandi ryavírísalá ryáhįtįkįranįa avįkalánį. Eriwá ry’esyongųrųvanį erį rikávaniká vusaná n’esyondáki eríkwangukara návi návî. Ovúligho ovų vųtsúkíre erilangirika eyí erítsųka okó múkerá w’ekÍhembúlo ,okó mwaka onó w’e 2020 ; omughómbé úhanganire  eríhala esyondákí sy’eyí íkwánásámalįré átyâ, kandí íkwá ínianémulįhįsya avávalamí v’evihasá vyangatulįsírye  endákį vy’oko mįkangį .

Óvuli mughéndya pįkípíkį akáliha dolárí (ngohe) nguma (1$us), n’omughéndya w’engųrųvánį akáliha eyí yo ngohé ítáno (5$us). Ávakálavalava omo ndákí sy’omo viharo eví vakághanza emívere eyí nga vuhungura, kyálhékiré íválw’ívasákíra, omó kíró ky’a 21okó múkerá gh’óvwįséghésa 2020, ómwamí w’avaswaghá y’enyáwalího éyirí kw’evíkumó vy’avįkalaní v’emįyį eyį. Vakátsongera oyúkateghaya esyondákį esį vati alí m’óvutatsómána, vatí n’omųvįrį w’erihala esyondákį ávirimulhéma, kikálheka mbíno esyopįkįpíkį n’esyongųrųvaní ísyavyá síkawa ahísi hó lúghumerera.

Omo nyáwalího ngumerera eyí, avásakí váyo móvatúlíréghó ngokó vakándíyihalira esyondáki esį omó mwanyándá wa sálóngo erítsųka omó víro 02 okó mwisí w’ovughoma erįhįka omó víro 02 okó mwisí w’omútúta 2020.

Erilangirá ngok’ómwamí w’e Vuswaghá syálítákwamirira emiyikunó yávo, avanyá Kívúgha, Mábambi, Vuyinga, Muhángį, Kasínga n’e Musyénéné móvahangéne nga mundú múghumá n’eríhighá ávakálihįsaya oko mįkangį. N’esyosálóngo mósyálwįrísyatsųka eyį y’omo syondákį n’éryóavatavalí vanásyayakondesaya aválhasį eryímanira avásólhesya v’oko mįkangį, mókwavére kwá víha.

Avéré ávųlįvwa esyosálóngó nga siwíte mughasó kį, Maître Mbusa Machozi Joseph, iye nga muhekí w’ekįnywá w’ávakáyikuná, mwátúlíréghó átya : « Tukákola emįvįrį y’esyosálóngo túkalhenga eríkehya erikumbaghalá ry’esyongųrųvánį érinémúvyá vulí kíro kó kyanákya. Enó ní míkerá ndatu misá, twámávighanzá vįnda 20, n’enzighé n’enzighé y’avakáhutalá. Kandi nívya avalįmí vakághalawá erilųsya akályó kávó k’omólį n’eríkolya k’éyiri ehítáli. N’evį vyóvikáhįtanaya ávakávalamira omo syndákí hino. »

Ná Múlume wa Muhindo Matimbya, iye nga mughómbe úkímanira eríhalwa ry’esyondákį esį, oyówavírighanwá n’avįkalánį, avéré ásųvya oko mwátsi oyú, íniavųgha ati akálhengekanaya avíkalaní nga vakátsotsívawá n’avesį v’e polįtíke. Akáyitulheraya ati : « Ngálhengekanayá nga ngándísųvųlįrįvwa esyombángwa syaghe, kundi nángwíte oko vipapųrá vy’avákulu v’engaviró ye Nord-Kivu évikányísįngayá mó mwįmanįrį w’esyondákį sy’oko luhánde lw’amálhengá-ryuvá lw’óvwamí vw’avaswágha. » N’erįhįká hatyá, esyondákį ésiri eyí sinémughendá síkákokotįvwá omo sólóngó sy’avįkalánį, n’omutsungí mwįnyesyó ísyáwíte mųvįrí akákoláyo.

SADIKI MATSINGA

Laisser un commentaire

Votre adresse e-mail ne sera pas publiée. Les champs obligatoires sont indiqués avec *